·
2024年3月嘅揚州，當時中國大運河博物館為宣傳第一批入選國家級非遺名錄的揚州漆器髹飾技藝，在館內設置了漆扇體驗處，於是漆扇就突然爆紅，大街小巷都打住非遺名號，提供漆扇體驗嘅服務，但當然呢種漆扇只係用現代嘅方法，比大眾感受一下呢個藝術，查實並唔係屬於非遺。
偶然響網上見到呢樣野，覺得非常好玩，但搵極都唔見香港有得玩，於是就自己參加市集，一齊玩。大漆係響大陸漆廠購買，我相信佢唔會亂嚟，比D由化學物溝出來嘅顏料我，大家見到有D漆扇嘅顏色薄而鮮，其實係腰果漆，一種化學合成嘅顏料，用松節油稀釋，會有殘留物，會臭臭的。我用嘅大漆，橘柚稀釋，香香的～
而扇方面，都有揀過，有D扇係由紙片紙板做嘅，落咗水可以話係即刻攣咗，甩皮，有D甚至溶到連個柄都甩埋。我嘅扇係兩面加厚生熟宣紙，中間夾有一片PVC膠，較實淨，唔用內功大力扇的話，唔會斷。（如果揸住扇柄尾大力扇會易斷）但當然啦，整扇嘅時候唔聽話，勁浸水，都會有以上嘅效果。
大漆有佢既性格，整完之後慢慢見到沉色咗，過三日，見到佢變鮮返，隔一輪再望佢，又靚咗。响屋企用咗唔同嘅方法練習同製作，覺得整漆扇真係變化多端，非常有趣，整一把絕對係唔夠。男友話都已經整咗咁多，仲未夠皮？咁又真係未玩夠，睇住客人整嘅扇，都未睇夠。
而家唔用漆扇參加市集，但假如有公司想搞整漆扇嘅活動，可以聯絡我，只要買得到扇都可以做得到活動。
